१. नेपाली सेनाका विभिन्न तालिम केन्द्र तथा युनिटहरुमा सञ्चालित सैन्य आधार तालिम आज मिति २०८१ कार्तिक १४ गते समापन भएको छ । तालिम समापनका अवसरमा आयोजित छुट्टाछुट्टै कार्यक्रमहरुमा सैन्य जवानहरूले अन्तिम दलेल कवाज प्रदर्शन गरेका थिए ।
२. नेपाली सेनाका तालिम केन्द्र सहित विभिन्न ३६ स्थानहरुमा सञ्चालित ९ महिना अवधिको सैन्य आधार तालिम सम्पन्न गरी ३,५५० जना पुरुष तथा ८३४ जना महिला गरी कुल ४,३८४ जना सैन्यहरू दीक्षित भएका छन् ।
३. तालिम समापनका अवसरमा आयोजित अन्तिम दलेल कवाज कार्यक्रम अन्तर्गत श्री नं.१ सैन्य तालिम केन्द्र, त्रिशूलीमा सैनिक तालिम महानिर्देशक श्री ध्रुव प्रकाश शाह, श्री नं.२ सैन्य तालिम केन्द्र, सैनामैना लगायत विभिन्न पृतना, बाहिनी तथा गण/गुल्महरुमा सम्बन्धित पृतनापति, वाहिनीपति लगायतका ज्येष्ठ अधिकृतहरुले कवाज निरीक्षण गर्नुका साथै उत्कृष्ट शिक्षार्थीहरूलाई पुरस्कृत गर्नु भएको थियो ।
४. त्रिशुलीमा आयोजित सैन्य आधार तालिमको अन्तिम दलेल कवाजमा सहभागीहरूलाई सम्बोधन गर्दै सैनिक तालिम महानिर्देशक श्री ध्रुव प्रकाश शाहले एक कर्मठ, इमानदार, अनुशासित एवं नेपाली सेनाको मूल्य-मान्यता र परम्परालाई पालना गर्दै राष्ट्र, जनता र संस्था प्रति समर्पित रही जस्तोसुकै परिस्थितिमा पनि अविचलित रहने नेपाली सेनाको सिपाही दर्जामा नव नियुक्त हुनुभएका सम्पूर्णलाई हार्दिक बधाई ज्ञापन गर्नुहुँदै शुभकामना दिनुभयो ।
५. विभिन्न स्थानहरुमा आयोजित सैन्य आधार तालिमको अन्तिम दलेल कवाजमा जिल्लास्थित जनप्रतिनिधि, सरकारी कार्यालयहरुका प्रमुख तथा प्रतिनिधि, नवनियुक्त सिपाहीका परिवारजन लगायत स्थानीय सञ्चारकर्मीको उपस्थिति रहेको थियो ।