१. मध्य पृतनाको जिम्मेवारी क्षेत्र अन्तर्गतका जिल्लाहरूमा रहेका विभिन्न सञ्चार माध्यमहरूमा आबद्ध १५ (पन्ध्र) जना सञ्चारकर्मीहरूको सहभागितामा रक्षा संवाददाता अभिमुखीकरण कार्यक्रम (Defence Correspondent Orientation Programme, DCOP) आज मिति २०८१ कार्तिक ०४ गते श्री मध्य पृतना हे.क्वा, सुपारेटार ब्यारेक, हेटौँडामा सुरु भएको छ ।

२. कार्यक्रमको शुभारम्भ गर्दै मध्य पृतनापति उपरथी श्री प्रदीप जङ्ग के.सी.ले नेपाली सेनाका संविधान प्रदत्त जिम्मेवारी सम्पादनका क्रममा आम जनतालाई सुसूचित गरेर राष्ट्रिय एकताको प्रवर्धन लगायत राष्ट्रहितहरुको संवर्धनका क्षेत्रमा सञ्चारकर्मीको भूमिका महत्त्वपूर्ण रहेको बताउनु भयो । 

३. कार्यक्रमको औपचारिक शुभारम्भ पश्चात् जनसम्पर्क तथा सूचना निर्देशक एवं सैनिक प्रवक्ता सहायक रथी श्री गौरव कुमार के.सी.ले रक्षा संवाददाता अभिमुखीकरण कार्यक्रममा सहभागी सञ्चारकर्मीहरूसँग अन्तर्क्रिया गर्नु भएको थियो । सोही अवसरमा उहाँले विगत लामो समयदेखि नेपाली सैनिक रेडियो कार्यक्रम तथा टेलिभिजन कार्यक्रम (माटोले माग्दैन आफैले दिनु पर्छ) प्रसारण गर्ने मध्य पृतनाको जिम्मेवारी क्षेत्र अन्तर्गतका एफ.एम. तथा टेलिभिजनका सञ्चालक सातजनालाई प्रोत्साहन स्वरूप नगद तथा कदर पत्र प्रदान गर्नु भयो ।  

४. पाँच दिनसम्म सञ्चालन हुने अभिमुखीकरण कार्यक्रममा नेपाली सेनाको सङ्गठनात्मक स्वरूप, जिम्मेवारी तथा भूमिका एवं मुख्य गतिविधिहरूको बारेमा जानकारीमूलक प्रस्तुतीकरण तथा अन्तरक्रिया सञ्चालन गरिनेछ । सहभागीहरूलाई नेपाली सेनाले सुरक्षा प्रदान गरिरहेका चितवन राष्ट्रिय निकुञ्ज लगायत अन्य महत्वपूर्ण संरचनाहरुको स्थलगत अध्ययन भ्रमण गराउने योजना रहेको छ ।